Ағымдағы жылдың 17 мамыр күні музейге Қаз.КСР–нің Еңбек сіңірген мұғалімі Сарғұнанов Ораз Өтебайұлының ұлы Сәлімғали Оразұлы келді.

Мақсаты әжесі Қытайының қолданған тамақ пісіруге арналған қазан ыдысын тапсыру болатын.

Сәлімғали ағайдың айтуы бойынша: Бұл - қазан Қаз.КСР-ның Еңбек сіңірген мұғалімі Сарғұнанов Ораз Өтебайұлының анасы Қытайының қолданған тұрмыстық заты екен.

Қаз.КСР-ның Еңбек сіңірген мұғалімі Сарғұнанов Ораз Өтебайұлының анасы Қытайы 1884 жылы дүниеге келіп, 1964 жылы өмірден озған.

Бұл қазанды Қытайы анамыздан соң, Сарғұнанов Ораз Өтебайұлының жұбайы Мақпал анамыз, одан кейін Сарғұнанов Сәлімғали ағамыздың жолдасы Қамаш апай қолданып келген. Қазан жақсы сақталған, тазартылған. Халқымызда қазанның басқа ыдыстарға қарағанда қазақ өмірі мен мәдениетінде алатын орны ерекше. Өйткені ол күнделікті тіршілік құралы. Қазан - шаңырақ сияқты бүтіндіктің белгісі іспетті. Қазақ дастарханына түсетін тағамдардың барлығы да ең алдымен осы қазаннан өтеді. Халық жай ғана қазан демей «қара қазан» деп қастерлеп айтады. Бұл жерде қара сөзі қасиетті, киелі, берекелі деген ұғымды білдіреді.

Музей басшысы Қ.Айдаралиева мен қор сақтаушы Б.Мукашева Сәлімғали Оразұлына алғысын білдіріп, киелі қара қазан болашақта тарихи жәдігер ретінде музей қорына қабылданып, ұрпақтан-ұрпаққа насихаттала беретіндігін жеткізді.